أطرديه وتزوجى

انا عربية أعيش فى امريكا من حوالى 30 سنة . فشلت فى زواجى الأول لأنى كنت مغرورة بجمالى ، وقمت بعملية إجهاض . وأصابنى إكتئاب . وتعرفت على شاب من بلدى الأصلى ، وأحببته ، وهو كان متجوز بأمريكية ولهما ولد ، ولكن بينهما إختلافات بسبب اختلاف الثقافة وسيطرتها على ابنها وأنها تجعل ابنها يكره ابوه وثقافة أبوه . كانوا على وشط الانفصال ، وانفصلوا ، وساب لها الولد وتركت الولاية ورجعت للولاية اللى منها أهلها . وتجوزنى أنا . وعشت معه سعيدة وأنجبت ابنى الوحيد وصار كل حياتى لدرجة انى خدت تلات سنين أجازة من الشغل أتفرغ له ، وبعدين كان معظم مرتبى بأصرفه عليه فى الحضانة والمربية وخلافه . وبدأت المشاكل بينى وبين أبوه اللى شايف ان أنا مجنونة بابنى، وانا شايفة انه قاسى بدليل انه رمى ابنه من الست الأمريكية وقطع صلته به . ابنى كبر وسط المشاكل دى ، وبقت عنه عقدة من أبوه . ولما دخل مرحلة المراهقة شُفنا منه الويل ، وزادت مشاكله وصلت للبوليس والمخدرات ، وفى الآخر ابوه طرده من البيت ، واتهمنى ان انا اللى افسدته . وكنت باقابل ابنى سرا وأديه فلوس ، ومات زوجى . ولأول مرة شفت فى الجنازة ابنه من الست الأمريكية ، يشبه ابوه المرحوم جوزى بشكل عجيب . شاب مؤدب ومهذب ومهندس فى شركة كبيرة ، وتنازل لى ولابنى أخوه عن الميراث ، وأخد اخوه فى حضنه ، وعرض انه يساعده . وأنا من خيبتى خدتنى العزة ورفضت . وانتهت علاقتنا به . لكن مشاكلى مع ابنى تعقدت . قاعد ليل نهار فى البيت من غير شغل وعنده 22 سنة . وحتى لا يساعد فى البيت ولا حتى فى تنظيف حجرة نومه ، ليله ونهاره يتسلى على الكومبيوتر والتليفزيون . وأنا ارجع من الشغل منهكة ولازم أخدمه . ولما أكلمه يدور على شغل يزعق لى ويقول انه عايش فى بيت أبوه وبيصرف من مال ابوه ، مع ان البيت اشتريته أنا وابوه من شغلنا وهو باسمى أنا ، وبوليصة التأمين على حياته كنت أنا وهوه بندفعها سوا ، وهى الآن فى حسابى فى البنك . مش بس كده . بقى ابنى يتحكم فىّ زى ما أكون أخته الصغيرة .يزعق لو تأخرت ويتكلم وحش عن صحاباتى اللى فى سن أمه . وجت الكارثة لما تقدم لى كام واحد يطلبوا الجواز ، ولما عرف إتجنن . مش عارفة اعمل ايه . لا قادره استحمله ولا قادرة ابعد عنه .